Skriða - Hörgárbyggð
Þór Jónsteinsson og Sigríður Kr. Sverrisdóttir

14.12.2008


Þessar myndir eru af Draumi frá Skriðu og voru þær teknar í dag.  Draumur er í eigu veiðifjölskildunnar í Stóra-Dunhaga og var þetta í 3 skipti sem farið var út á honum.  Draumur er undan Mola og Skutlu frá Brúnastöðum.  Hann er mjög geðgóður og skemmtilegt tryppi í alla staði, rúllar tölt og brokk og fer mjög vel á stað. 


14.12.2008


Í dag fórum við í smá göngutúr upp í fjall til að líta á höfðingjana á bænum.  Það urðu heldur betur fagnaðarfundir hjá elstu meðlimum hrossahópsins og yngstu  meðlimum fjölskyldunnar.  Enda fer það mjög oft vel saman lítil börn og gamlir hestar. Faxi, sá rauði er 23 vetra Dreyrasonur,  Grettir er einnig 23 vetra Dreyrasonur og svo er það hann Snerill sem ég veit lítið annað um en hann er hvítur og afskaplega skemmtilegur.  Svo skemmtilegur að hann réð sér ekki fyrir hlátri eins og sjá má á myndunum. 


07.12.2008

Búið er að vera mikið fjaðrafok í sveitinni undanfarið vegna hrútamála.  Nú er náttúrulega tími tilhleypinga svo nóg er að  gera hjá hrútunum á þessum árstíma.  Sauðfjárræktarfélagið keypti hrút austur í landi sem hlotið hefur nafnið Lambás.  Ekki voru allir á eitt sáttir með þessi kaup þar sem sumum þótti hann helst til dýr, enda næst dýrasti hrútur landsins.   Lambás er hinsvegar staddur hér í Skriðu og tekur á móti kindum héðan af flestum bæjum!!!   Svona rétt eins og fyrstu verðlauna graðhestur.  Sauðfjárræktarfélagið Nöldur og Nagg auglýstu svo annan hrút til afnota en hann er að austan líka.   Hann var reyndar frekar ódýr (miðað við hinn) en litfagur og stæðilegur hrútur sem hlaut nafnið Dollar.  Þar sem Þór heldur nú grimmt undir Lambás, búinn að versla tolla af nágrönnum og svo framvegis ákvað ég (Sigga) náttúrulega að fara með hana Franskeskur mína undir Dollar.  Enda hagsýn húsmóðir og hún Franseska af gamla mórukyninu okkar.  Í dag gerðum við sem sagt út leiðangur, ég og Bragi (stjórnarmaður í Nöldur og nagg)  ásamt fríðu föruneyti, og fórum með sitthvora kindina yfir á Ytri-Bægisá.  En þar virðist hið nýtilkomna félag halda bækistöðvar sínar.   Tollurinn var auglýstur á 3 dollara en ekki var tekið fram hvaða gengi skyldi miða við. 


02.12.2008

Veðrið hefur verið heldur stormasamt undanfarið eins og sést á myndunum enda er mjög jólalegt í dag.  Snjór yfir öllu, bjart og kalt.  Við sóttum hann Hákon upp í fjall fyrir helgi.  Hann er alltaf frekar fljótur að leggja af þegar harðna fer á dalnum svo nú stendur hann í rúllu og hefur það gott með Mola og fleiri höfðingjum.  Hrossagreyin voru snjóbarin en í góðu standi og ánægð að fá brauðbita að narta í.   Seinustu kálfarnir voru teknir inn um helgina, svo nú getum við farið að sofa betur á nóttunni.  Ég var farin að sofa hálf illa að vita af þeim úti!!


23.11.2008

Hér er svo mynd af graðhestinum okkar og Jóns Páls, honum Kopar frá Hvanneyri.  Gullfallegur og prúður á tagl og fax!!


23.11.2008

Nú eru hrossinn kominn í vetrarbúninginn, folöldin kafloðin og bangsaleg.  Ég er að vinna í að koma folöldunum og nýju hrossunum inn á heimasíðuna og læt vita af því þegar það er allt komið inn.  Vonandi verður það á næstu dögum.    Á fyrstu þremur myndunum eru tvö rauð Álfsbörn (sá dekkri undan Dalrós),  jarpa merfolaldið er svo undan Markúsi og Rauðhettu.  Brúntvístjörnótta folaldið heitir Rommel og er undan Mola og Drottningu.

 
21.11.2008
 
Við fengum skemmtilega heimsókn  í fjár- og hesthúsið í dag.  Það voru þeir Unnar, Sindri og Matthías en þeir eru í Þelamerkurskóla.   Þeir skoðuðu kindurnar og hrútana og fengu smá fræðslu um þær.  Svo brugðu þeir sér aðeins á hestbak á hann Tvist.   Þeir voru áhugasamir og ætla kannski að fá að kíkja í fjósið seinna.  Egill Már á svo afmæli í dag er orðinn 6 ára og Eyrún varð 13 ára á þriðjudaginn svo þetta líður allt saman. 


06.11.2008

Nú eru tamningarnar loksins að fara af stað hjá okkur.  Sóttum 7  4. vetra tryppi fram á Barkárdal um síðustu helgi svo nú er húsið nær fullt af tryppum.  Þó eru nú nokkur reiðfær hross inni líka, sem betur fer.   Á myndunum eru Bylur og Draumur  Molasynir, svo Birta Moladóttir og Sikill undan Sunnu og Stæl frá Miðkoti.  Næst 8 vetra brún meri undan Ísak frá Eyjólfstöðum, en hana fengum við fyrir gamlan áburðardreifara  Síðast er nýjasti barnahesturinn á bænum sem heitir Tígull. 


06.11.2008

Nýr hestur á sölusíðunni,  Snillingur frá Grund 2

Snillingur video
 

26.10.2008

Hér er allt á kafi í snjó, veturinn virðist bara vera kominn.  Kannski maður verði að fara að taka fram skíðin bráðum.  Árshátíðin var mjög skemmtileg  mikið fjör fram á nótt.  Af því tilefni birtum við nokkrar myndir úr sveitalífinu  gamlar og nýjar.  Á þessari mynd er ég (Sigga) og Þórhalla Andrésdóttir.  Ég ætla að setja inn fleiri myndir úr þessu myndasafni seinna.


21.10.2008
Vildi bara minna alla sveitungana á árshátiðina í Hlíðarbæ næsta laugardagskvöld!! Nú er bara að taka fram dansskóna og skella sér.  Það verður veislumatur, söngur og glens og svo auðvitað skálað fram á rauða nótt. 


15.10.2008

Þessa dagana snýst lífið um  að  undirbúa veturinn, það er slátrað bæði sauðfé og nautgripum.  Fryst, sagað, sviðið, súrsað, úrbeinað, hakkað, búnir til sperlar, slátur og kjötfars svo eitthvað sé nefnt.  Við munum allavega ekki svelta í bráð í kreppunni.  Er samt farin að sjá eftir því að hafa ekki sett niður kartöflur til að hafa eitthvað meðlæti ef allt fer á versta veg.  Þór, Marteinn og Bragi eru í jarðvinnslu, þeir plægja, herfa, tæta........ nei ekki aðra upptalningu.   Nú eru nánast allar merarnar farnar sem voru hjá Mola og hann komin í hvíld.  Hesthúsið orðið vel hálft af hrossum sem á að fara að temja.  Við erum búin að fá nokkur hross í alskonar hestakaupum og viðskiptum undanfarið svo nú þarf að bretta upp ermar og temja þau.   Einnig eignuðumst við helminginn í 4. vetra graðhesti fyrir skömmu síðan.  Hann heitir Kopar frá Hvanneyri og er undan Þorra frá Þúfu, sjá mynd.  Meðeigandi okkar er Jón Páll Tryggvason. 


03.10.2008

Til hamingju með afmælið Jónsteinn Helgi 4 ára strákur.


03.10.2008
Á miðvikurdagskvöldið fór fram hrútasýning fjárræktarfélagsins hér í fjárhúsinu í Skriðu.  Margt var um manninn og einhverjir hrútar mættu líka!!   Okkar hrútar stóðu efstir,  bæði lambhrútar og veturgamlir.  Kíkið á sauðfé til að sjá frétt og myndir.


01.10.2008

Nú er hún Viðbót frá Flatatungu komin til Svíþjóðar. Það er alltaf einhver hreyfing á hrossamarkaðinum sem betur fer.  Kíkið á hugmynd og lesið vísu sem Þór fékk í sms skilaboðum.  Það er alltaf svo gaman þegar maður finnur að fólk skoðar heimasíðuna og hefur gaman af!!!!!

22.09.2008

Nú er haustið komið fyrir alvöru með öllum sínum lægðum og látum. En maður má nú ekki kvarta, þar sem sumarið og það sem af er haustinu hefur verið frábært.  Allt kapp er nú lagt í að klára haustverkin.  Kornið er komið inn í hlöðu og var uppskeran ágæt.  Seinni göngur voru um síðustu helgi og gekk Agnar Páll með okkur alla leið, og er þar með yngsti gangnamaður sem farið hefur þessa leið.  Hann stóð sig vel að vanda.   Í dag vorum við svo að reka saman lömbin og vigta þau og á morgun koma svo ráðunautarnir og dæma hvað er ásetningshæft og hvað ekki!!! 


17.09.2008

Á Laugardaginn síðasta voru göngur og réttir.  Kíkið inn á sauðfé til að sjá fleiri myndir frá réttardeginum.  Veðrið var frábært og allt gekk vel.  Veðrið var reyndar það gott að skjáturnar vildu ekki heim, heldur sóttu upp í kletta og reyndu að fela sig. 


08.09.2008

Kíkið á hross til sölu.  Sól frá Arnarstöðum og nokkrir vel ættaðir ungfolar til sölu.


26.08.2008

Á laugardaginn var hið árlega mót Framfara á Björgum.  Veðrið var frábært og aldrei hafa fleiri keppt á mótinu né verið fleiri áhorfendur og nú.  Öll Skriðufjölskyldan tók þátt og  gekk vel. Agnar var í 1. sæti í pollaflokk á Fléttu, Egill í öðru á Gretti og Jónsteinn keppti á Faxa og fékk verðlaunapening fyrir eins og öll börnin í pollaflokki.  Eyrún varð í öðru sæti á Gusti í barnaflokki.  Þór vann karlaflokkinn á Mola og skeiðið á Seif og Sigga varð 5. í kvennaflokki á Freyju.   Skemmtilegur dagur sem endaði með hlöðuballi í Fornhaga. Ýtið hér til að sjá fleiri myndir frá mótinu. 

22.08.2008

Þessa viku eru krakkarnir búnir að vera á reiðnámskeiði á Björgum á hverjum degi.  Það er Framfari, hrossaræktarfélagið, sem stendur alltaf fyrir þessu reiðnámskeiði á haustin.  Kennari var Lina Eriksson.  Krakkarnir skemmtu sér vel og í dag var svo grillað handa öllum sem tóku þátt í námskeiðunum.  Kennt var í 5 hópum bæði fullorðnum og börnum.  Á morgun verða svo hinir árlegu Bjargarleikar en það er mót sem Framfari stendur einnig fyrir.  Skemmtilegt mót, þar sem allir félagsmenn og íbúar sveitarinnar eru hvattir til að taka þátt. 

16.08.2008
Til að sjá myndir af kofanum sem að krakkarnir hafa verið að smíða, getið þið farið í um okkur/fólk og smellið svo á Agnar.

15.08.2008

Elvar Jónst. og Júlía voru svo frábær að bjóða okkur aftur með á hreindýraveiðar.  Lagt var í hann eftir fjós á miðvikudagskvöld og keyrt austur á Djúpavog, þar lögðum við okkur í íbúð sem leiðsögumaðurinn, Stefán, útvegaði okkur.   Svo var vaknað eldsnemma í gærmorgun og haldið á veiðar.  Veðrið var frábært og landslagið stórbrotið.  Leiðin lá upp á Hellnisskógaheiði á Lónsöræfum.   Veiðiferðin tók 12 tíma og má segja að við höfum verið á göngu nær allan tímann.  Við sáum mörg dýr en flest voru það kýr með kálfa en ætlunin var að finna almennilegan tarf.  Þetta var svo ótrúlega gaman að það er varla hægt að lýsa því.  Við komumst mjög nálægt sumum dýrunum og náðum flottum myndum af þeim.  Strákarnir þurftu samt að leggja á sig heilmikið puð til að ná í tarfinn en það tókst að lokum.  Dýrið var svo bara hlutað sundur og borið heim í bakpokum!! 
Þegar við komum niður á Djúpavoga aftur beið okkar svo bara uppdekkað borð, dýrindis lax með allskyns meðlæti. Það var þá konan hans Stefáns sem var búin að útbúa þetta fyrir okkur. Kíkið inn á myndir/hreindýraferð2008 til að sjá fleiri myndir.

 
29.07.2008

Hrossin eru þjálfuð nokkuð stíft þessa dagana, hér á bæ.  Marion er að frumtemja nokkur tryppi og gengur það bara mjög vel hjá henni. Einnig eru krakkarnir dugleg að ríða út enda veðrið til þess.  Á myndunum eru Eyrún á Glitni, Sverrir á Faxa og Marion á Val Molasyni.  Svo er Marion með Grana bundinn utan á.  En Grani er hestur sem við eignuðumst um daginn í hestakaupum. 


23.07.2008

Í dag var farið í árlegan reiðtúr upp í Baugasel í Barkárdal.  Það var blíðskaparveður og  dagurinn mjög vel heppnaður. Flestir fóru ríðandi, nokkrir keyrandi og einn gangandi og allir komust á leiðarenda.  Þar var grillað og farið í leiki og  svo riðið  til baka.   

13.07.2008

Við fórum í skemmtilegt brúðkaup í gær.  Vinir okkar, Halla og Siggi, voru að ganga í það heilaga.  Athöfnin fór fram í Akureyrarkirkju en veislan var svo á Melum í Hörgárdal.  Þar var tjúttað fram á nótt að Hörgdælasið.  Á myndunum má sjá Þór laga Martein á Barká til fyrir veisluna, hvað gerir maður jú ekki fyrir vini sína. Síðan eru brúðhjónin í snúning og svo með Hörpu systir Höllu.  Kíkið inn á hugmynd og sjáið sérstaka mynd af brúðhjónunum. 

08.07.2008
         
Nú erum við komin heim eftir meira en viku dvöl á suðurlandi, nánar tiltekið á landsmóti á Hellu.  Þetta var rosalega skemmtileg ferð og gekk bara nokkuð vel.  Eyrún og Þór komust í milliriðla í barnaflokki og A-flokki.   Við sáum frábær hross og skemmtum okkur vel með góðum vinum.  Vikan var ótrúlega fljót að líða og gerðum við ekki helminginn af því sem við vorum búin að ætla okkur.  Mestur tíminn fór í að stússa við hrossin og glápa í brekkunni og skemmta okkur.  Þurftum reyndar einu sinni að pakka saman fellihýsunum og flýja mótsvæðið vegna veðurs! en það var bara til að gera mótið eftirminnilegt.  Um helgina var svo sumarblíða og ekki yfir neinu að kvarta.

23.06.2008

Í gær rákum við saman tryppin og gáfum ormalyf.  Síðan rákum við þau í frelsið fram á Barkárdal en þar erum við svo heppin að hafa hagagöngu fyrir þau á sumrin og fram á haust.  Tryppin hafa rosalega gott af því að alast upp í svona landslagi, það styrkið þau mjög mikið. 

18.06.2008

Halli afi (Haraldur Siguðsson) varð 85 ára fyrir rétt mánuði síðan og af því tilefni var boðið til veislu í sal tónlistaskólans á Akureyri.  Á myndunum eru fyrst Agnar Páll og afi, svo afa- og langafabörnin að syngja fyrir afa sinn og seinast er svo afi með sonum sínum, tengdadætrum og afkomendum þeirra. 

17.06.2008
Nú er nærri því frost á Fróni, ekki spennandi!! Okkur vantar almennilegt veður til að geta heyjað meira fyrir landsmót en þetta reddast nú einhvernveginn eins og alltaf.  Hún Marion, austuríska tamningakonan okkar, er komin aftur brún og sælleg eftir mánaðar leyfi í heimalandi sínu.  Þannig að nú fer eitthvað að ganga með tamningarnar. 

15.06.2008

Nú er enn ein helgin liðin og var þessi bara nokkuð góð og margt um að vera.  Heyskapur byrjaður og fer vel af stað, Kristín Hlín að útskrifast úr Háskólanum á Akureyri, Jón Kjartan Jónsson vinur okkar 35 ára og hélt af því þrusu hattaveislu.  Síðast en ekki síst fór svo fram gæðingamót Léttis og Funa á Melgerðismelum og var það jafnframt úrtaka fyrir landsmót.  Við erum á leið á landsmót með nokkur hross í kerru þar sem Þór og Eyrún unnu sér inn þátttökurétt á landsmóti.  Þór með Mola í B flokk og Seif í A flokk og Eyrún með Gust í Barnaflokk. 

15.06.2008

Í dag var haldin árleg rodeó keppni í Skriðu.  Fór hún vel fram og enginn slasaðist.  Þó lentu sumir flatir í réttinni að vanda.  Kíkið inn á Kýr til að sjá fleiri myndir. 

10.06.2008


Síðastliðið Föstudagskvöld var haldið töltmót á Björgum, það var hrossaræktunarfélagið Framfari sem stóð fyrir keppninni.  Aðal tilgangurinn með keppninni var að  hafa gaman eina kvöldstund í góðra manna hópi.  Allt gekk upp og úr varð hin mesta skemmtun í frábæru veðri. Á myndunum eru Þór á List, Sigga á Gusti, Jolli á Nökkva frá Björgum, Davíð á Geisla frá Úlfstöðum, Þór á Pöndu frá Þrastarhóli og Óskar á Grím frá Seljabrekku.

09.06.2008

Í morgun fengum við tvö folöld undan Álfi frá Selfossi.  Merarnar köstuðu nánast á sama tíma á nánast sömu þúfunni í rigningarsudda.   Við fengum rauða meri og rauðstjörnóttan hest, þannig að litadýrðin var ekki alveg eins og við höfðum vonað.  Hestfolaldið er undan Dalrós og er það fyrsta folaldið hennar.  Hann átti í einhverjum vandræðum með að komast á spena og var því tekinn inn í bragga.  Þar braggaðist hann fljótt og er nú komin út aftur. 



Í dag  fjölgaði smádýrunum á bænum, en það voru kanínurnar Kolbrún og Mjallhvít sem fluttu frá Barká og hingað.  Á myndunum er unnið að því að smíða búrið fyrir þær en Jón Páll var meistarinn yfir smíðunum.  Með honum á myndinni eru svo handlangarar og lærlingar, Jónína, Agnar, Egill, Jónsteinn og Kristín Ellý á Björgum. 

06.06.2008

Rosalega sætir kettlingar fást gefins á góð heimili.  Einn hvítur, nokkrir bröndóttir og brandflekkóttir.  Hringið í síma 8630057/8991057 eða sendið tölvupóst, skrida@emax.is .

01.06.2008

Í dag fóru kýrnar út í sólina og var þónokkuð fjör hjá þeim að vanda.  Þær komu svo inn sólbrennar og sætar seinnipartinn.

31.05.2008

Eyrún er búin að vera að æfa dans í vetur ásamt Brák vinkonu sinni.  Þær eru að hjá Point dansstúdíói á Akureyri og í dag var risa sýning í  Íþróttahöllinni.  Frábær sýning, vel skipulögð og gekk hratt fyrir sig.

26.05.2008

Nú er viðburðarík helgi afstaðin.  Þór og Eyrún voru að keppa á opna Norðurlandsmótinu á Akureyri og komu heim með nokkrar dollur fyrir mig að þurrka af!!!!   Sem sagt stóðu þau sig vel, kíkið inn á eiðfaxavefinn og sjáið úrslitin og myndir frá mótinu.  En það voru fleiri sem stóðu sig vel,  hún Lina Erikson var að útskrifast sem reiðkennari frá Hólum og erum við náttúrulega rosalega stolt af henni.   Hún hélt einnig frábæra ræðu á útskriftinni sem gerði hana eftirminnilega.  Þetta var flottur dagur á Hólum, skemmtilegar sýningar hjá nemendunum og flott hross.  Á myndinni er Lína á Hörpu frá Skriðu, Galdursdóttir sem er nú í Ameríku.
Svo var auðvitað  söngvakeppnin og vil ég endilega fara að skipta norðurlöndunum eitthvað upp svo við fáum fleiri stig.   Danmörk gæti t.d verið Sjáland og Jótland: samtals 24 stig fyrir Ísland!!!!!!
Svo er sláttur hafinn í Skriðu sem sagt búið að slá garðinn einu sinni og barnapían komin upp, það er trampólínið.

19.05.2008

Kíkið á söluhross og sjáið Brennu og Mirru.

18.05.2008
 

Í gær var Goðamótið á Akureyri.  Það er mjög skemmtilegt barna og unglingamót sem haldið er á hverju vori.  Krakkarnir stóðu sig öll mjög vel.  Jónsteinn keppti í teymt undir flokki en Agnar og Egill í pollaflokki.  Í þessum flokkum fá allir krakkarnir verðlaun og rosa gaman.  Eyrún keppti í barnaflokki í tölti og fjórgangi.  Hún keppti á Gusti frá Hálsi og sigraði báðar greinar.  Hún kom önnur inn í úrslit í tölti en fimmta í fjórgangi og vann sig upp í fyrsta sæti í úrslitum.   Þetta var skemmtilegur dagur, grillaðar pylsur í hádeginu og góður andi í fólkinu.  Ýtið hér til að  sjá fleiri myndir.

16.05.2008

Núna er hreinsunarátak í sveitafélaginu og verið að hvetja fólk til að taka til í kringum sig.  Víða getur maður fundið rusl og er um að gera að láta það hverfa eins og þennan haug sem var búin að vera í felum bak við hól.  Sverri tókst þó að bjarga einum mjólkurbrúsa úr haugnum og mun hann án efa sóma sér vel í hlaðinu í Skriðu seinna í sumar. 

15.05.2008
     
Vantar einhverjum ungan, fallegan vel ættaðan stóðhest í merar í sumar?  Stígur frá Skriðu er þriggjavetra foli undan Gullinstjörnu frá Akureyri og Hágangi frá Narfastöðum.  Hann er því sammæðra Mola, og undan Hágangi sem er undan Glampa frá Vatnsleysu.   Stígur er stór, fríður og geðgóður foli með fallegar hreyfingar.  Endilega hafið samband ef þið hafið áhuga með því að senda póst skrida@emax.is eða hringja í síma 8991057.  Ýtið hér til að sjá fleiri myndir og fá meiri upplýsingar um Stíg. 

14.05.2008

Í dag fæddist fyrsta folald sumarsins.  Það er falleg brún meri undan Hélu frá Skriðu og Andvara frá Ey.  Tók þessar myndir af Dalrós í leiðinni.  Hún er undan Mola og er fylfull við Álfi frá Selfossi.Við erum mjög spennt að sjá hvernig folald við fáum þar.

13.05.2008


Í gær var vormót Léttis á Akureyri.  Þór keppti þar í tölti á Mola og var það frumraun Mola á keppnisvellinum.  Það gekk bara mjög vel og enduðu þeir í fyrsta sæti eftir úrslit með 7,72 í einkunn. Þór keppti einnig á Seif í 100 m. skeiði og gæðingaskeiði.  Þetta voru ekki alveg fyrstu sprettirnir hjá þeim félögum og enduðu þeir einnig í fyrsta sæti í báðum greinum með tímann 8,5 í 100 m. og einkunnina 7,71 í gæðingaskeiði. 

12.05.2008

Nú er allt á fullu í vorverkum.  Búið að plægja kornakurinn, og byrjað að keyra skít. Langt komið að slóðadraga o.s.frv.   Allar vélar sem búið er að nota eitthvað í vor eru búnar að bila, svo sumarið byrjar ekki of vel. En vonandi fer þetta allt að lagast.  Nú eru flestar ærnar bornar og sumar farnar að liggja úti og nóg að gera í að verka laufið úr garðinum!!!  Það eru komnar fleiri myndir úr sauðburðinum.  

05.05.2008

Í gær var sýningin æskan og hesturinn í Svaðastaðahöllinni á Sauðárkrók.  Eyrún, Agnar og Egill tóku þátt í sýningaratriðum Léttis.  Eyrún var með eldri hópnum en strákarnir með yngri.  Öll stóðu þau sig með sóma eins og reyndar öll börnin.  Eyrún reið á Gusti, Agnar á Fléttu og Egill á Gretti.  Ýtið hér til að sjá fleiri myndir frá deginum. 

01.05.2008

Það var danssýning í leikskólanum í dag.  Eldri krakkarnir buðu foreldrum að koma og horfa á. Á myndinni er Egill að dansa við Önnu Ágústu í Auðbrekku.  Kíkið á síðuna hans Egils og sjáið fleiri myndir.

28.04.2008
Við fórum á sýninguna á Sauðárkrók, Tekið til kostanna, um helgina og skemmtum okkur vel.  Þór var að keppa þar í skeiði á Seif.  Honum gekk bara vel, skeiðaði alla sprettina og náði góðum tíma.  Það voru mörg flott atriði og greinilega mikið lagt í undirbúninginn.  Við förum svo aftur á Krókinn um næstu helgi, því krakkarnir okkar taka þátt í sýningunni æskan og hesturinn.  Sýningin verður á Laugardaginn kl. 13:00 og svo aftur kl. 16:00.

24.04.2008

Kíkið á hross til sölu - Brenna frá Fellsseli, hágeng alhliða hryssa til sölu.

24.04.2008

Nú er komin sumardagurinn fyrsti og er hann frábærlega fallegur og vonandi fyrirboði um það sem koma skal í sumar.  Kindurnar eru byrjaðar að bera, komin 4 lömb þegar þetta er skrifað.  Það er alltaf jafn gaman þegar lömbin fara að fæðast, kíkið á sauðfé til að sjá fleiri myndir.  Í gærkvöldi fórum við að sjá Fló á skinni og hvet ég alla sem ekki eru búnir að fara að drífa sig og hlæja sig máttlausa eina kvöldstund. 

23.04.2008

Í dag var áheitahlaup í skólanum hjá Eyrúnu og Agnari, safnað var fyrir UNICEF og gekk það bara vel. Sigga fór í hlaupaskóna og mætti á svæðið og hljóp með Agnari.  Kíkið á heimasíðu þelamerkurskóla og lesið meira um hlaupið og skoðið myndir.

22.04.2008

Langt síðan ég skrifaði eitthvað síðast, harði diskurinn í tölvunni tók upp á því að bila en snillingarnir hjá Þekkingu á Akureyri náðu samt sem áður öllum myndum og gögnum af honum.  Sem betur fer, þetta kenndi manni að það er betra að eiga afrit af þessu dóti annars staðar.  Það eru komnar myndir úr fjárhúsinu undir sauðfé.  Vignir í Litlu-Brekku kom í gær og tók DNA sýni úr nokkrum hrossum.  Það er gert til að hægt sé að sanna ætterni þeirra og þá fá þau A-vottorð.  Á myndunum eru Þór og Vignir að taka sýni úr Birtu Moladóttir. Svo er Bylur einnig Molasonur og svo  kindurnar í nýja húsinu.


06.04.2008

Í gær var haldið Íþróttamót hjá Létti á Akureyri, Sigga og Marion skráður sig í keppni og héldur galvaskar í bæinn snemma morguns á hrútnum(rauður ram-pallbíll) með 5 hesta kerru í eftirdragi.  Veðrið var frábært, keppendur það fáir að Sigga og Marion komust báðar í úrslit í tölti og allt var þannig eins og best verður á kosið fyrir útlendinginn og fjósakonuna!!!
Seinni partinn fórum við svo í fermingarveislu til hennar Fanndísar á Björgum. 

04.04.2008

Þetta er nýja ræktunarmerin í Skriðu.  Hún heitir List frá Fellskoti (IS1996288474) og er undan Galdri frá Sauðárkróki og Sokkadís frá Bergstöðum. Við erum mjög hrifin af hrossum undan Galdri, annað eins tölt er vandfundið og yfirleitt eru þetta líka mjög glæsileg hross.  Hún List sameinar þessa kosti, frábært tölt og há fyrstu verðlaun fyrir byggingu.  List fer undir Mola í sumar. 

03.04.2008

Sigga fór á Dalvík í gær á knapamerkjanámskeið hjá henni Ingu Mæju.  Það er alveg frábært, og spurning hvort okkar lærir meira ég (sigga) eða hesturinn (Gustur), en bæði höfum við mjög gott af þessu og líka gaman, allavega ég, veit ekki með hann. 

03.04.2008
Héðan er allt gott að frétta, enginn úr fjölskyldunni hljóp 1. apríl en Eyrún eyddi deginum í að gera símaat í ættingjum og vinum, veit ekki hvaðan hún hefur þessa stríðni!!!!!!!
Mörg Smáverk ehf eru á fullu ásamt heimilisfólki að innrétta fjárhúsin og gengur vel.  Farið inn á sauðfé til að kíkja á myndir af framkvæmdunum. 

30.03.2008

Senn kemur vor í loft þó að úti sé skafrenningur og frost en svona lítur bærinn okkar út um sumartímann.
kíkið inn á um okkur/landslag til að sjá fleiri myndir.

29.03.2008

Við fórum í rekstur í dag.  Riðum yfir í Bægisá og til baka.  Okkur finnst alveg frábært fyrir hrossin  að fara með þau í rekstur og stefnan er að fara einu sinni í viku í svona smá túra.  Eyrún brosti alveg hringinn þegar hún kom í hlaðið á henni Mirru sinni, enda efnileg meri. 

28.03.2008
Nú eru framkvæmdir hafnar að nýju í hesthúsinu, en nú eru það fjárhúsin sem á að innrétta. Því á helst að vera lokið fyrir sauðburð.  Við fengum tvær flottar innflutningsgjafir í hesthúsið á dögunum, en það var stigi upp á kaffistofu frá Jolla og Jónínu og skilti á húsið með nafni þess frá Elvari Jónsteins.  Húsið hefur hlotið nafnið Klambrasel, en það nafn kom upp einn daginn í kaffitímanum, þegar allt gekk einhvernveginn á afturfótunum.  Ýtið hér til að sjá myndir.

27.03.2008

Það var mjög gaman í Svaðastaðahöllinni í gær, flott mót hjá Skagfirðingum og fínir hestar í keppninni.  Þór gekk mjög vel að sýna Mola, hann stendur alltaf fyrir sínu.    En svo týndu þeir félagar einni skeifu þannig að sýningin varð kanski full stutt en allavega nógu löng til að ná nokkrum myndum!!! Ýtið á myndirnar til að sjá þær stærri. 
 
25.03.2008

Svona lítur auglýsingin um Mola út, það stendur til að dreifa henni eitthvað um.  Þór fer í Svaðastaðahöllina með hann annað kvöld og á að sýna hann þar.  Smellið á auglýsinguna til að sjá hana stærri. 

25.03.2008

Þetta er Tvistur, 4 vetra graðhestur undan Mola sem lofar mjög góðu.  Smellið á myndirnar til að sjá þær stærri. 

24.03.2008

Hún Yrsa okkar á hvolpa núna, alveg ótrúlega sæta eins og þið sjáið.  Þetta eru border collie hvolpar og verða þeir vonandi jafn frábærir smalahundar og félagar og mamma þeirra.  Kíkið inn á önnur dýr og skoðið myndir af hundunum okkar!!!

23.03.2008

Gleðilega páska.  Erum búin að vera dugleg á skíðum um helgina, enda gott veður og færi í Hlíðarfjalli.

19.03.2008

Fréttir úr sauðheimum!!  Við heimtum tvær gimbrar af fjalli um helgina, feitar og sællegar.  Það var fólkið á Öxnhóli sem fann þær og kom þeim í hús.  Í dag byrjaði Þór svo á vorrúningnum og gekk það furðu vel miðað við ástandið á bóndanum. 

17.03.2008

  Fleiri myndir koma síðar. 

16.03.2008

Nú er frábær helgi liðin,  hún byrjaði með stórgóðri árshátíð í Þelamerkurskóla á fimmtudagskvöldið.  Þar voru sýndir margir skemmtilegir leikþættir og auðvitað fóru öllu börnin á kostum.  Sveitin okkar á greinilega marga upprennandi skemmtikrafta.  Agnar og Eyrún stóðu sig vel, en Eyrún var að leika Unnar aðstoðarskólastjóra en Agnar lék vondu drottninguna í Mjallhvít og dvergarnir sjö. 
Við hjónin, ásamt Eyrúnu, brunuðum svo í borgina á föstudagsmorguninn.  Eyrún fór að heimsækja frænkur sínar en við fórum á Hótel Sögu með nokkrum sveitungum og skemmtum okkur vel.  Fórum á tónleika með Sálinni, sáum Ladda sextugur +,  straujuðum visa kortið í Smáralindinni og skoðuðum hross.  Sem sagt vel heppnuð helgi.  Alltaf er samt gott að koma heim aftur.!!!!

13.03.2008

Konurnar í sveitinni spila alltaf bandý á miðvikudagskvöldum en í gær var íþróttahúsið lokað vegna árshátiðar Þelamerkurskóla og því drifu kellur sig í keilu í nýja keilusalinn á Akureyri.  Það var frábært.  Ótrúlega góðir taktar hjá okkur miðað við reynslu.  Helga í Þríhyrningi var yfirburðar góð tók hverja felluna á fætur annari. En fast á hæla hennar komu Bogga í Dunhaga og fleiri.  Svo var auðvitað borðað eitthvað gott eins og alltaf ef fleiri en tvær konur koma saman.

12.03.2008
Nú er bara verið að njóta lífsins og ríða út ásamt öðrum hefðbundnum störfum.  Veðrið er búið að vera frábært undanfarið og ekki yfir neinu að kvarta nema kanski einu!!  Honum Þór tókst nú að brjóta á sér hendina í fyrradag, var að járna og var barinn.  Svo nú er hann bara í gipsi og því minna gagn af honum en venjulega!!!!

06.03.2008
Nú eru komnar inn fleiri myndir af hesthúsinu fullkláruðu. Ýtið hér til að skoða

05.03.2008

Nú er  búið að taka skeifnasprettinn á henni Viðbót og gekk það bara vel, þæg og fín meri!!!

03.03.2008
 

Á laugardagskvöldið vorum við með svona smá sýnishorn af opnunarhátið í hesthúsinu fyrir þá sem komu að byggingunni með okkur.   Það var mjög gaman og heppnaðist bara vel.  Eins og á öðrum svona hátíðum var auðvitað smá dagskrá,  gjörningur til heiðurs Óla smiðs var afhjúpaður,  iðnaðarmenn kepptu við óbreytta í því að reka nagla í spýtu, græja rafmagnskapal, hrútspungaáti og drykkju.  Iðnaðarmennirnir voru mun liprari með hamarinn en þeir óbreyttu stungu þá af í drykkjunni og hrútspungunum.   Tekið skal fram að enginn slasaðist við byggingu þessa húss en þegar þessir sömu menn öttu kappi var sagan önnur.  Menn voru annað hvort keyrðir heim með tognuð liðbönd eða velgju í maga.
Við færðum honum Braga í Lönguhlíð merfolaldið Alvör frá Skriðu að gjöf fyrir vel unnin störf.  Síðan var sungið og trallað fram á nótt undir stjórn Elvars Jónsteinssonar.

01.03.2008
 
Í dag er langþráður dagur runninn upp.  Fyrsta áfanga í byggingu nýs hesthúss og fjárhúss er lokið og hrossin voru tekin inn.  Það er búið að vera allt á fullu undanfarna daga og rosalega margir búnir að vera að hjálpa okkur.  Moli fékk náttúrulega að fara fyrstur inn í húsið en svo fylgdu aðrir í kjölfarið þar til húsið var nánast fullt.  Húsið rúmar 20 hesta í rúmgóðum stíum. 

29.02.2008

í dag er víst hlaupársdagur, en ótrúlegt en satt, hann er víst ósköp svipaður og aðrir dagar.   Veðrið í gær var frábært, sól og frost og jafnfallinn snjór yfir öllu.  Það gerist ekki fallegra.  Kíkið endilega á myndir af landslaginu okkar hér í Hörgárdal. um okkur/landslag

27.02.2008

Rakst á þessa skemmtilegu mynd af Agli og Mola sem var tekin í september 2007.  Egill og Moli eru miklir vinir og eyðir sá fyrrnefndi miklum tíma í að kemba, verka úr hófum og dekra við þann síðarnefnda.
 
26.02.2008
Komnar nýjar í myndasyrpuna frá húsbyggingunni - kíkið á þær.

25.02.2008

Hér á bæ er þónokkuð stóð á útigangi og þessi grey eru algjörlega sí svöng á þessum tíma árs enda ekki mikið að hafa í úthaganum.  Ljótt er að heyra fréttir af hrossum sem ekki er hugsað um, ótrúlegt að þetta sé ennþá til.   Sigga greip með sér myndavélina um daginn þegar hún var að gefa!!

15.02.2008
Sigga byrjaði loksins á knapamerkjanámskeiði í gærkvöldi.  Það er búið að gera nokkrar tilraunir til að fara en alltaf komið vitlaust veður.  Námskeiðið er á Dalvík og er alveg frábært að fá að taka þátt í þessu með konunum þar.  Það er nýbúið að setja upp nýtt hringgerði hjá þeim, og er gaman að fylgjast með uppbyggingunni hjá þeim.  Núna er verið að æfa fyrir verklega hlutann í öðru stigi, eins og t.d. sveigjustopp.

13.02.2008
Héðan er allt gott að frétta, allir að smíða endalaust.  Við erum orðin verulega þreytt á endalausu roki eins og örugglega flestir.  Gengur frekar hægt að temja í þessari veðráttu en vonandi fer þetta nú  að lagast.  Kíkið á myndir þar eru komnar myndir úr hestaferð sem við fórum sumarið 2007. Svo eru börnin að útbúa sér síður undir liðnum um okkur/fólk

10.02.2008

Í gær var verið að sónarskoða kindurnar á bænum.  Það er gert til að sjá hvort þær eru með lambi eður ei og hvort það eru 1,2 eða 3 lömb í hverri kind. Þessar upplýsingar auðvelda svo vinnu við sauðburðinn
umtalsvert. Farið inn á sauðfé til að sjá fleiri myndir.

07.02.08

Öskudagur 2008.  Indjáni, ninja og sjálfur Batman. 


Kíkið á Hross til sölu - þrjú ný hross, tvö undan Mola frá Skriðu og hryssa undan Adam frá Ásmundarstöðum.

03.02.2008

Myndað í frosti og snjó.  Hér er Brenna frá Fellsseli u. Markúsi frá Langholtsparti.

31.01.2008

Í sumar fórum við í frábæra ferð austur í Álftafjörð.  Tilgangur ferðarinnar var að finna, elta uppi og
skjóta hreindýr.  Þetta var alveg rosalega gaman, gott veður og rosalega fallegt landslag.  Kíkið endilega
á myndir úr ferðinni  Hreindýraferð .

16.01.2008

Og við byggjum og við byggjum.....kíkið á myndir af fjár- og hesthúsinu okkar í byggingu.

15.01.2008

Sigga tók við 3v. fyrir Bessa frá Skriðu og Þór hér með 2v. fyrir Sögu frá Skriðu.
Folaldasýning Framfara.  Fórum með 8 folöld frá Skriðubúinu og 5 þeirra undan Mola.  Saga frá Skriðu, undan Sunnu og Mola, varð í öðru sæti í flokki merfolalda og Bessi frá Skriðu, undan Gígjari frá Auðsholtshjáleigu og Dimmu frá Akri, varð þriðji í flokki hestfolalda.

Þrjár svartar Moladætur og skvísurnar Eyrún, Kata og Marion á folaldasýningu Framfara.  

10.12.2007

Kíkið inn á unghross.

08.12.2007

Verið að reisa hesthús og fjárhús á melnum norðan við bæinn.  Grindin risin og síðan koma yleiningar utan á hana.

22.11.2007

Kíkið inn á "Önnur dýr" og sjáið skemmtilegar myndir (þó fáar séu).  Einnig eru komnar inn myndir af þeim köppum Gretti og Hákoni.

11.11.2007

Sjá þátt um Fjórðungsmótið á Austurlandi í sumar.  Viðtal við Eyrúnu og myndir af henni í keppninni á Gusti frá Hálsi, myndir af Mola frá Skriðu og einnig Þór og Seifur frá Skriðu.  Skemmtilegur þáttur um mannlíf og hross á FM07.

Nóv. 2007
Opnuð ný heimasíða.  Hér munum við reyna eftir fremsta megni að setja inn fréttir, fróðleik og allt mögulegt sem tengist búskapnum og hversdagslífinu á bænum. 

Skriða - Hörgárbyggð - 601 Akureyri - tel. +354 461 1057 gsm +354 899 1057
Vefstjórar: Þór og Sigga